TUICO Kuna Uhakika wa Utetezi wa Changamoto za Mahala pa Kazi

TUICO ni chama cha wafanyakazi cha kipekee sana hapa chini Tanzania. TUICO imeanzishwa kwa mujibu wa sheria kwa madhumuni mbalimbali ambayo yamefafanuliwa kikamilifu katika Katiba ya yake, sura ya pili (2:1) ambayo ni pamoja na:-

Kuboresha na kuendeleza hali nzuri ya wanachama katika maisha yao wakiwa kazini.

Kushirikiana na kujadiliana na waajiri katika kuunda kamati za majadiliano na kuanzishwa kwa mabaraza ya wafanyakazi ili kudumisha amani mahali pa kazi.

Kujadiliana na kuondoa tofauti zinazojiotokeza baina ya mwajiri na mwanachama au Mwanachama mmoja na mwingine kwa njia ya makubaliano ya amani kila itakapowezekana

Naibu Katibu Mkuu wa TUICO Taifa Ndg. Tamim Salehe akimkaribisha Waziri wa Nchi Ofisi ya Waziri Mkuu Sera, Bunge, Vijana, Ajira na Wenye Ulemavu Mhe. Jenista Mhagama kwenye moja ya semina za Mei Mosi mwaka 2019 jijini Mbeya.

Kujadili, kufunga na kusimamia utekelezaji wa mikataba ya Hali Bora za kazi. Aidha kushirikiana na wahusika wengine katika kusimamia utekelezaji wa TUZO, Kanuni za Utumishi na Sheria nyingine za kazi zitumikazo nchini.

Kushirikiana na kubadilishana ujuzi na vyama vingine vya wafanyakazi nchini pamoja na vile vya kimataifa.

Kuwasiliana na Serikali kuhusu haja ya kutunga Sheria sahihi za Kazi na kuandaa Sera za kuendeleza uchumi na maisha ya jamii.

Kulinda maslahi ya Wanachama kwa kusaidia Serikali kuepukana na Uandaaji wa Sera ambazo hazina manufaa kwa Wafanyakazi.

TUICO imeendelea kusimamia msingi wa Haki, Heshima na Masilahi ya wafanyakazi kwa kuhakikisha tuyanadai, tunayalinda na kuyatetea ili kuhakikisha wafanyakazi wanakuwa katika mazingira ambayo ni rafiki na yasiyo ya hatari kwao.

Aidha, kama chama TUICO tumeendelea kuhakikisha tunafanya mazungumzo ya pamoja kati ya mwajiri na mfanyakazi, ikiwa ni katika kuhakikisha kunakuwa na mahusiano mema kati ya pande zote mbili.

Tumeshirikiana na serikali katika kutatua migogoro katika maeneo mbalimbali, huku mingine ikisababishwa na changamoto za majanga kama ugonjwa wa Covid-19 ambalo kwa kiasi kikubwa limeathiri mifumo ya maisha hasa katika sekta ya viwanda, Biashara na kadhalika.

Huu ni wito kwa wafanyakazi kutoka sekta ya viwanda, biashara, taasisi za fedha, huduma na ushauri wajiunge na TUICO ili waendelee kufurahia uanachama wenye uhakika wa utetezi pale changamoto za ajira  zinapojitokeza. TUICO tunaishi kwenye sheria na miongozo mbalimbali inayoongoza kada ya ajira hapa nchini na mikataba mingine ambayo tumeridhia kama  taifa.

MSHIKAMANO DAIMA.