Zaidi ya Wafanyakazi 10 wa Yaohui Furniture Wajiunga na TUICO

Jana tulikuwa na wakati mzuri na wafanyakazi wa YAOHUI FURNITURE huko Mbezi- Tangi Bovu, Dar es Salaam. Tulizungumza nao juu ya umuhimu wa vyama vya wafanyakazi.

Boniface Kigosi, Katibu Msaidizi Sekta ya Biashara (wa tatu kutoka kushoto) akiwa kwenye picha ya pamoja na wafanyakazi wa YaoHui Furnitures iliyopo eneo la Mbezi, Tangi Bovu (DSM) baada ya semina kuhusu umuhimu wa TUICO.

Tulisisitiza faida ya Mkataba wa Hali Bora. Kwa kuwa sheria haisemi kila kitu ambacho wafanyakazi wanapaswa kufaidika mahali pao pa kazi, Mkataba wa Hali Bora unafafanua zaidi ya sheria. Tunafurahi kwamba wafanyakazi walikuwa tayari kabisa kujiunga na vyama vya wafanyakazi. Zaidi ya wafanyikazi 10 walionyesha nia ya dhati kabisa kujiunga na TUICO.

Mkataba wa Hali Bora huleta uhusiano mzuri kwenye maeneo ya kazi. Ni mkataba muhimu hasa kwenye usimamizi wa kazi na unawarahisishia waajiri, vyama vya wafanyakazi na wafanyakazi wenyewe juu ya namna wanavyoshirikiana mahali pa kazi na matokeo ya baadaye na kwahiyo mkataba wa Hali bora unabaki kuwa kiungo muhimu katika mafanikio mahala pa kazi.

Aidha, mkataba wa hali bora, unatafsiri utendaji thabiti wa kampuni au taasisi, unapunguza utoro, kuongezeka kwa ufanisi, tija kubwa na hutengeneza mazingira ya ubunifu kuwahamasisha wafanyakazi kwa kuongeza uaminifu wa mfanyakazi. Hapo jana tuliwaambia wafanyakazi wa YAOHUI FURNITURE wajiunge nasi ili wafaidike na mikataba hii na wasaidiwe wakati changamoto zingine zinapotokea mahali pao pa kazi.

Kwa mifano dhahiri, tulihubiri jinsi TUICO ilivyojitahidi hadi kusainiwa kwa mkataba wa hali bora na Lake Cement Ltd, TANESCO na vile vile jinsi tulivyotatua migogoro kama ile ya Mazava Fabrics and Production East Africa kule Morogoro.